Çorovodë, Skrapar
11 Tetor 2025
Financuar me fonde grant nga Fondacioni Albanian Besa Capital (ABC)

Fondacioni Albanian Besa Capital (ABC) ka mbështetur me fonde grant organizimin e eventit “Skrapari në gotë”, një nismë e Bashkisë Skrapar që synon të promovojë prodhimet bujqësore, artizanale dhe kulturore të zonës, duke nxitur zhvillimin ekonomik vendor dhe turizmin rural.

Ky aktivitet, i cili u zhvillua në qytetin e Çorovodës, mblodhi prodhues dhe artizanë lokalë – gra, të rinj dhe sipërmarrës nga zonat rurale – të cilët patën mundësinë të ekspozojnë dhe të shesin produktet e tyre tradicionale, të promovojnë mjeshtëritë e trashëguara brez pas brezi dhe të krijojnë bashkëpunime të reja tregtare.

Qëllimi dhe objektivat e projektit
Qëllimi kryesor i këtij projekti është promovimi i produkteve bujqësore dhe ofertës turistike të Skraparit, në funksion të rritjes së punësimit dhe zhvillimit ekonomik të zonës.

Objektivat specifike përfshijnë:
• Rritjen e vizibilitetit të zonës dhe të ofertës së saj agroturistike;
• Krijimin e tregjeve të reja dhe më të qëndrueshme për prodhuesit lokalë;
• Nxitjen e sipërmarrjes së vogël dhe familjare në fushën e bujqësisë, artizanatit dhe turizmit;
• Rritjen e ndërgjegjësimit për ruajtjen e trashëgimisë kulturore dhe natyrore;
• Forcimin e bashkëpunimit ndërmjet institucioneve, prodhuesve dhe komunitetit lokal.

Rëndësia e mbështetjes nga Fondacioni ABC
Mbështetja financiare e Fondacionit ABC ka qenë thelbësore për realizimin e këtij aktiviteti. Përmes këtij financimi u siguruan burimet logjistike dhe organizative për zhvillimin e panairit, si hapësirat ekspozuese, materialet promovuese etj.

Përmes këtij financimi, Fondacioni ABC afirmon rëndësinë e bashkëpunimit me pushtetin vendor si mjet për nxitjen e zhvillimit lokal me ndikim të qëndrueshëm social e ekonomik.

Nëpërmjet mbështetjes së tillë, Fondacioni ABC kontribuon në ruajtjen e traditave lokale, nxitjen e sipërmarrjes së grave dhe të rinjve, si dhe në zhvillimin e zonave rurale me potencial të lartë agroturistik.

Fondacioni Albanian Besa Capital, në kuadër të misionit të tij për fuqizimin e sektorit të mikrofinancës në Shqipëri, ka vendosur të mbështesë me grant financiar Shoqatën Mikrofinanca Shqiptare, në funksion të rritjes së kapaciteteve institucionale dhe përmirësimit të infrastrukturës së saj.

Mbështetja financiare do të mundësojë mobilimin e ambienteve të reja të punës të Shoqatës, të cilat do të shërbejnë si qendër funksionale për aktivitetet që lidhen me zhvillimin e sektorit mikrofinanciar në vend. Këto ambiente do të krijojnë një hapësirë të përshtatshme për organizimin e trajnimeve, takimeve me partnerët, përfaqësues të institucioneve dhe përfituesit, duke kontribuar drejtpërdrejt në rritjen e efikasitetit dhe bashkëpunimit institucional. Kjo mbështetje do të forcojë më tej rolin e Shoqatës si një platformë bashkëpunuese dhe e qëndrueshme në zhvillimin e sektorit të mikrofinancës në Shqipëri.

Ky grant vjen si pjesë e angazhimit të Fondacionit ABC për të mbështetur iniciativat që forcojnë infrastrukturën dhe qëndrueshmërinë e aktorëve kyç në mikrofinancë, në funksion të përfshirjes sociale dhe financiare afatgjatë.

Urime Shoqatës Mikrofinanca Shqiptare për këtë hap të rëndësishëm drejt një veprimtarie më të konsoliduar!

Në kuadër të programit të granteve për vitin 2025, Fondacioni Albanian Besa Capital (ABC) ka dhënë një kontribut të rëndësishëm në nxitjen dhe fuqizimin e sipërmarrjes femërore të orientuar drejt biznesit social, duke mbështetur projekte që ndikojnë drejtpërdrejt në përmirësimin e statusit social dhe ekonomik të grave në Shqipëri.

Një nga projektet fituese për këtë fushë është “ART TURIZËM”, i cili po implementohet në rajonin e Kukësit nga Shoqata Kombëtare për Integrim, Zhvillim dhe Ndihmë për Shtresat në Nevojë “SH.K.I.ZH”. Ky projekt ka si qëllim aftësimin dhe fuqizimin e 15 grave artizane nga bashkitë Kukës, Has dhe Tropojë, për të kthyer artizanatin tradicional në burim të qëndrueshëm të ardhurash dhe mjet për vetëpunësim.

Rëndësia e mbështetjes nga ABC:
Mbështetja financiare e Fondacionit ABC për këtë projekt përfaqëson jo vetëm një investim në kapacitetet e grave, por edhe një strategji të qëndrueshme për të zhvilluar ekonominë sociale në zonat më të margjinalizuara të vendit. Përmes kësaj mbështetjeje:

• Forcohet roli i gruas si sipërmarrëse sociale aktive;
• Promovohet dhe ruhet trashëgimia kulturore dhe artizanale shqiptare;
• Ndihmohet në zhvillimin e turizmit artizanal si pjesë e një ekonomie lokale të qëndrueshme.

Ndikimi i projektit:
Gratë pjesëmarrëse në implementimin e projektit përfitojnë aftësi të reja profesionale në fushën e artizanatit, rrisin aftësitë e tyre menaxhuese dhe sipërmarrëse në biznes, vetëbesimin, krijojnë rrjete bashkëpunimi dhe dalin nga izolimi ekonomik. Komuniteti lokal përfiton nga gjallërimi i traditës artizanale, ndërsa turistët pasurojnë përvojën e tyre kulturore në rajon. Ky projekt shërben si model për rritjen e pavarësisë ekonomike të gruas përmes formave alternative të zhvillimit, në përputhje me prioritetet strategjike të Fondacionit Albanian Besa Capital.

Fondacioni ABC në mbështetje të Sipërmarrjes dhe të rinjve.