Me mbështetjen financiare të Fondacionit Albanian Besa Capital është përmbyllur me sukses projekti “Për ribrandimin dhe promovimin e imazhit të ri të ASF”, një iniciativë që synoi forcimin e identitetit vizual dhe institucional të Agro Social Fund sh.a., duke e bërë institucionin më të dukshëm, më të besueshëm dhe më pranë klientëve dhe komuniteteve që u shërben.
Falë këtij financimi, ASF arriti të realizojë një sërë ndërhyrjesh konkrete, si:
- aplikimin e identitetit të ri vizual në degët dhe ambientet e punës;
- brandimin e automjeteve zyrtare, duke rritur prezencën e institucionit në terren;
- prodhimin e materialeve promocionale dhe stendave institucionale;
- pajisjen e stafit me elementë identifikues të markës së re;
- instalimin e kutive të ankesave, duke nxitur transparencën dhe përmirësuar komunikimin me klientët.
Pse është i rëndësishëm ky financim?
Mbështetja e Fondacionit ABC shkon përtej një investimi në elementë vizualë. Forcimi i identitetit të institucioneve që ofrojnë shërbime me ndikim social dhe ekonomik ndihmon në rritjen e besimit të qytetarëve, përmirëson komunikimin me përfituesit dhe rrit efektivitetin e shërbimeve të ofruara.
Institucione më të forta dhe më të konsoliduara janë një faktor i rëndësishëm për zhvillimin e qëndrueshëm të vendit. Ato kontribuojnë në zgjerimin e aksesit të qytetarëve dhe bizneseve të vogla ndaj shërbimeve financiare dhe sociale, nxisin zhvillimin lokal dhe krijojnë mundësi më të mira për përfshirje ekonomike e sociale.
Në këtë kuadër, financimi i këtij projekti nga Fondacioni ABC përfaqëson një investim në rritjen e kapaciteteve institucionale dhe në ndërtimin e institucioneve profesionale, transparente dhe të orientuara drejt nevojave të komunitetit.
Në fotot bashkëlidhur mund të shihni disa nga rezultatet konkrete të këtij projekti, të reflektuara në elementet e reja të identitetit vizual të Agro Social Fund sh.a.
Fondacioni Albanian Besa Capital mbetet i angazhuar në mbështetjen e iniciativave që krijojnë vlerë të qëndrueshme për shoqërinë dhe kontribuojnë në zhvillimin ekonomik dhe social të Shqipërisë.
